ಸದಾ ನಗು ಮೊಗದ ಡಿ.ವಿ.ಸದಾನಂದ ಗೌಡ ಅವರು ಸಂಸದರಾದ ಬಳಿಕ ಮಂಗಳೂರು ಲೋಕಸಭಾ  ಕ್ಷೇತ್ರದ  ಜನರ ಅಭಿವೃದ್ಧಿಗಾಗಿ ಜನರ ಒಳಿತಿಗಾಗಿ ಹಲವಾರು ಕಾರ್ಯಕ್ರಮಗಳನ್ನು ಹಮ್ಮಿಕೊಂಡಿದ್ದಾರೆ ಮಾತ್ರವಲ್ಲ ಸಮಸ್ಯೆಗಳ ಪರಿಹಾರಕ್ಕಾಗಿ ಹೋರಾಟವನ್ನು ಮುಂದುವರಿಸಿದ್ದಾರೆ.
ಸಂಸತ್ ನಲ್ಲಿ ಬೀಡಿ ಉದ್ಯಮ , ರೈಲು ದಾರಿ, ಅಂಗನವಾಡಿ ಕಾರ್ಯಕರ್ತೆಯರ ಸಮಸ್ಯೆಗಳು, ಕಾಫಿ ಮತ್ತು ಅಡಿಕೆ ಬೆಳೆಗಾರರ ಸಮಸ್ಯೆ , ದೂರವಾಣಿ ಸಂಪರ್ಕ, ತುಳು ಭಾಷೆಯನ್ನು 8ನೇ ಪರಿಚ್ಚೇಧಕ್ಕೆ ಸೇರಿಸುವುದರ ಬಗ್ಗೆ, ಮಂಗಳೂರು ಮೀನುಗಾರಿಕಾ ಬಂದರು ಅಭಿವೃದ್ಧಿ , ರಾಜ್ಯ ಹೆದ್ದಾರಿಯನ್ನು ರಾಷ್ಟ್ರೀಯ ಹೆದ್ದಾರಿಯನ್ನಾಗಿಸುವುದು, ಅರಣ್ಯ ಭೂಮಿ ಸಮಸ್ಯೆ ಹೀಗೆ ಹತ್ತು ಹಲವು ಸಮಸ್ಯೆಗಳ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಕೇಳಿದ್ದಾರೆ ಗೌಡರು.
ರಾಜ್ಯದಲ್ಲಿ 2004-05ರಲ್ಲಿ ಉಂಟಾದ ಸಿಇಟಿ ಬಿಕ್ಕಟ್ಟು ನಿವಾರಣೆಗೆ ಕೇಂದ್ರದ ಹಸ್ತಕ್ಷೇಪಕ್ಕಾಗಿ ಹಾಗು 2005ರಲ್ಲಿ ಕರಾವಳಿ ಜಿಲ್ಲೆ ಮತ್ತು ಕರ್ನಾಟಕದ ವಿವಿಧ ಭಾಗದಲ್ಲಿ ಸಂಭವಿಸಿದ ನೆರೆಹಾವಳಿ ಸಮಸ್ಯೆ ಪರಿಹಾರಕ್ಕೆ ತಕ್ಷಣ 100 ಕೋಟಿ ಬಿಡುಗಡೆ ಗೊಳಿಸಬೇಕು ಎಂದು ಶೂನ್ಯ ವೇಳೆಯಲ್ಲಿ ಗೌಡರು ಮಾಡಿದ ಒತ್ತಾಯ ಸ್ಮರಣೀಯ.

ಸಾಧನೆ:
ಮಂಗಳೂರು-ಸಕಲೇಶಪುರ ರೈಲು ಮಾರ್ಗವನ್ನು ಪೂರ್ಣಗೊಳಿಸಲು ಸಂಸದ ಸದಾನಂದ ಗೌಡರು ಹೋರಾಟ ನಡೆಸಿದ ಪರಿಣಾಮವಾಗಿ ಮಂಗಳೂರು- ಸುಬ್ರಮಣ್ಯ ಪ್ರಯಾಣಿಕರ ರೈಲು ಹಾಗು ಗೂಡ್ಸ್ ರೈಲು ಸಂಚಾರ ಆರಂಭಿಸಿದೆ. ಮಂಗಳೂರು- ಬೆಂಗಳೂರು ರೈಲು ಸಂಚಾರ ಪ್ರಾರಂಭಿಸುವ ಬಗ್ಗೆ ಒತ್ತಡ ಹೇರಿದ್ದರ ಪರಿಣಾಮ ರಸ್ತೆಯ ಸುರಕ್ಷತೆ ಬಗ್ಗೆ ಸಿ ಆರ್ ಎಸ್ ತಪಾಸಣೆ ನಡೆಸಿ ರೈಲು ಸಂಚಾರಕ್ಕೆ ಯೋಗ್ಯ ಎಂಬ ಪ್ರಮಾಣ ಪತ್ರವನ್ನು ರೈಲ್ವೇ ಸುರಕ್ಷಾ ಆಯುಕ್ತರು ನೀಡಿದ್ದಾರೆ ಮಾತ್ರವಲ್ಲ ಸದ್ಯದಲ್ಲೇ ರೈಲು ಸಂಚಾರದ ಬಗ್ಗೆ ಅಧಿಕಾರಿಗಳು ಆಶ್ವಾಸನೆ ನೀಡಿದ್ದಾರೆ.
ಕಾಫಿ ಬೆಳೆಗಾರರು ಕಾಫಿಯ ದರ ಇಳಿತದಿಂದಾಗಿ ಕಂಗಾಲಾದಾಗ ಕೇಂದ್ರ ಸರಕಾರದಿಂದ 375 ಕೋಟಿ ರೂ.ಕಾಫಿ ಪ್ಯಾಕೇಜನ್ನು ಬೆಳೆಗಾರರಿಗೆ ಒದಗಿಸುವಂತೆ ಸರಕಾರದ ಮೇಲೆ ಒತ್ತಡ ಹೋರಿ ಬಿಡುಗಡೆ ಮಾಡಿಸಿದ್ದಾರೆ, ಕಾಫಿ ಬೆಳೆಗಾರರು ಪಡೆದುಕೊಂಡ ಸಾಲದ ಮೇಲಿನ ಬಡ್ಡಿ ಮನ್ನಾ ಆಗಿದ್ದು, ಸಾವಿರಾರು ಸಣ್ಣ ಬೆಳೆಗಾರರು ಸಾಲದ ಋಣಭಾದೆಯಿಂದ ಮುಕ್ತಾಗಿದ್ದಾರೆ.
ಅಡಕೆಗೆ ಬೆಂಬಲ ಬೆಲೆ ಒದಗಿಸಲು ಪ್ರಾಮಾಣಿಕ ಪ್ರಯತ್ನ ನಡೆಸಿದ ಪರಿಣಾಮ ಅಡಕೆ ಬೆಳೆಗಾರರಿಗೆ ಬೆಂಬಲ ಬೆಲೆ ನೀಡಲಾಗಿದೆ. ಅಡಕೆಯ ಮಾರುಕಟ್ಟೆ ದರ ಕೂಡ ಏರಿಕೆಯಾಗಿದೆ. ಹೊರದೇಶದಿಂದ ಅಡಕೆ ಆಮದು ಮಾಡದಂತೆ ಸರಕಾರದ ಮೇಲೆ ಸದಾನಂದ ಗೌಡರು ಒತ್ತಡ ಹೇರಿದ್ದಾರೆ.
ಮಂಗಳೂರಿನ ವಿಶೇಷ ಆರ್ಥಿಕ ವಲಯದಲ್ಲಿ ಸ್ಥಾಪಿಸಲು ಉದ್ದೇಶಿಸಲಾಗಿದ್ದ ಓ ಎನ್ ಜಿ ಸಿ ಸ್ಥಾವರವನ್ನು ಪೆಟ್ರೋಲಿಯಂ ಸಚಿವರು ಬೇರೆಡೆಗೆ ಸ್ಥಳಾಂತರಿಸಲು ಪ್ರಯತ್ನಿಸಿದಾಗ  ಪ್ರತಿಭಟಿಸಿ ಕೇಂದ್ರ ಸರಕಾರದ ಮೇಲೆ ಒತ್ತಡ ಹೇರಿ ಮಂಗಳೂರಿನಲ್ಲಿ ಸ್ಥಾವರ ನಿರ್ಮಾಣವಾಗಲು ಸದಾನಂದ ಗೌಡರು ಪ್ರಯತ್ನಿಸಿದ್ದಾರೆ.
ಅಭಿವೃದ್ಧಿ ಪಥದಲ್ಲಿ…
2004-05ರಲ್ಲಿ ಶಿಫಾರಸ್ಸು ಮಾಡಿದ 178(2 ಕೋಟಿ ರೂ.)ಕಾಮಗಾರಿಗಳು ಮಂಜೂರಾಗಿದ್ದು, 171 ಕಾಮಗಾರಿಗಳು ಪೂರ್ಣಗೊಂಡಿದ್ದು, 7 ಕಾಮಗಾರಿಗಳು ಪ್ರಗತಿಯ ಹಂತದಲ್ಲಿವೆ. 2005-06ನೆ ಸಾಲಿನಲ್ಲಿ ಶಿಫಾರಸ್ಸು ಮಾಡಿದ 183 (2 ಕೋಟಿ ರೂ.) ಕಾಮಗಾರಿಗಳ ಪೈಕಿ 137 ಕಾಮಗಾರಿಗಳು ಪೂರ್ಣಗೊಂಡಿದ್ದು, 40 ಕಾಮಗಾರಿಗಳು ಪ್ರಗತಿಯ ಹಂತದಲ್ಲಿವೆ. 2006-07ನೇ ಸಾಲಿನಲ್ಲಿ 2.25 ಕೋಟಿ ರೂ.ವಿನ 178 ಕಾಮಗಾರಿಗಳು ಮಂಜೂರಾಗಿದ್ದು, 54 ಕಾಮಗಾರಿಗಳು ಪೂರ್ತಿಯಾಗಿವೆ,94 ಕಾಮಗಾರಿಗಳು ಪ್ರಗತಿಯಲ್ಲಿವೆ.
ಕೊಡಗಿನ ಬಹುಬೇಡಿಕೆಯ ಸೈನಿಕ ಶಾಲೆಗೆ ಕೇಂದ್ರ ಸರಕಾರದಿಂದ ಮಂಜೂರಾತಿ ಪಡೆಯಲಾಗಿದ್ದು, ಸೂಕ್ತ ನಿವೇಶನ ಗುರುತಿಸುವಿಕೆಯ ಕಾರ್ಯ ನಡೆಯುತ್ತಿದೆ.